سياسة الخصوصية
آخر تغيير: ٨ تشرين الأوّل ٢٠٢٦
بالمختصر
- ما نبيع بياناتك ولا نعطيها لأحد. وما بالموقع إعلانات، ولا شي يلاحقك بمواقع ثانية.
- لمن تكون داخل لحسابك، نعرف إنك فاتح الموقع هسه وبأي صفحة، ووكت كل دخول إلك. وإذا ما داخل، ما نعرف منو إنت، ولا نسجّل وين تروح بالموقع.
- حسابك يحفظ اسمك وبريدك، وصورتك إذا دخلت بـGoogle أو رفعتها. وعمرك وجنسك إذا كتبتهن إنت. وبس.
- إذا قبلت الكوكيز، عدّاد Google Analytics يعدّ الزيارات والصفحات بلا اسمك. وإذا رفضت ما ينحسب شي.
- كلمة السر تنحفظ مشفّرة. حتى إحنا ما نكدر نشوفها.
- تكدر تطلب نمسح حسابك بأي وقت، ونمسحه خلال ٣٠ يوم.
١منو إحنا
MYELON فريق صغير بالعراق يسوّي تطبيقات ومواقع. هذي السياسة تخص هذا الموقع (www.myelon.si، وقبله myelonlabs.vercel.app) والحساب اللي تسوّيه بيه. وتطبيق «دفتر المحل» إله سياسته الخاصة.
٢شنو ناخذ منك
هذا كل شي. القائمة كاملة، مو مختصرة:
| الشي | شنو بالضبط | منين يجي |
|---|---|---|
| الدخول بـGoogle | بريدك، واسمك، وصورتك، ورقم حسابك عند Google. | من Google، بموافقتك |
| الدخول بالبريد | اسمك، وبريدك، وكلمة السر مشفّرة. | إنت تكتبه |
| صفحة حسابك | عمرك وجنسك، وصورة ترفعها — إذا حطّيتهن. كلهن اختيارية، وتكدر تشيلهن بأي وقت. | إنت تكتبها |
| الموافقة | أي نسخة من هذي السياسة والشروط وافقت عليها، ووكت الموافقة. | الموقع يسجّلها |
| الدخول والخروج | وكت كل دخول، وعنوان الإنترنت (IP) اللي دخلت منه. | تسجّله قاعدة البيانات حتى تحمي الحساب |
| نشاطك بالموقع | لمن تكون داخل لحسابك بس: آخر وكت كانت صفحة من الموقع مفتوحة قدّامك وأي صفحة، وتلفون لو تابلت لو حاسبة، وكم مرّة زرت الموقع، ووكت كل دخول للموقع وبـGoogle لو بالبريد. ما نسجّل شنو تكتب ولا وين تضغط. | الموقع يسجّله، مرّة كل دقيقة تقريباً والصفحة قدّامك |
وما ناخذ رقم تلفونك، ولا مكانك، ولا رسائلك أو ملفاتك بـGoogle. Google ينطينا الأربعة اللي فوق وبس.
٣ليش ناخذها
- حتى تدخل لحسابك وتطلع منه.
- حتى نعرفك لمن تراسلنا.
- حتى يبيّن حسابك مثل ما تريده: صورتك، وعمرك وجنسك إذا حطّيتهن.
- حتى نحمي حسابك من اللي يحاول يدخل بمكانك.
- حتى نعرف منو يستعمل الموقع، ومنو فاتحه هسه.
وما نستعملها لإعلانات، وما نرسلك رسائل تسويق.
٤وين تنحفظ، ومنو يشوفها
- الحساب ينحفظ بـSupabase، بخوادم بفرانكفورت بألمانيا. وهي نفس القاعدة اللي بيها حسابات «دفتر المحل»، فإذا يوم دخلت الدفتر بنفس الحساب، يصير نفس الحساب.
- الصورة اللي ترفعها تنحفظ بنفس المكان. تبيّن بحسابك وبرأس الصفحة لمن تكون داخل، ورابطها ما ننشره بمكان.
- نشاطك بالموقع ينحفظ بنفس القاعدة، ويشوفه حساب واحد بس: حساب صاحب الموقع، من لوحة خاصّة بيه.
- الصفحات ينشرها Cloudflare، ويسجّل عناوين الإنترنت بسجلاته مثل أي موقع.
- عدّاد الزيارات، إذا قبلت الكوكيز بس، عند Google Analytics: كم زيارة، وأي صفحات، ومن أي بلد وجهاز — بلا اسمك ولا بريدك، وبلا إعلانات.
- الخطوط تجي من Google Fonts، والمكتبات من jsDelivr. الاثنين يشوفون عنوان الإنترنت مالتك لمن تنفتح الصفحة.
منو يشوف بياناتك؟ إحنا بس. ما نبيعها ولا نعطيها لأحد، إلا إذا طلبها القانون العراقي.
٥شنو ينحفظ بمتصفحك
- جلسة الدخول، حتى ما تدخل كل مرّة. تنمسح لمن تطلع من الحساب.
- موافقتك، دقايق بس، لحد ما ترجع من Google أو من رابط بريدك.
- «أوقف الحركة»، لهذي الزيارة بس.
- لعبة «ألعاب» تنحفظ على جهازك حتى تشتغل بلا نت.
- جوابك على الكوكيز، حتى ما نسألك كل مرّة.
- كوكيز العدّاد، إذا ضغطت «أقبل» بس: رقم عشوائي من Google Analytics (_ga) يعرف بيه إن الزيارتين من نفس الجهاز، ويبقى لحد سنتين. تكدر ترجع عن جوابك من «الكوكيز» تحت بالصفحة، فينمسح.
ما نستعمل كوكيز إعلانات، ولا شي يلاحقك بمواقع ثانية.
٦حقوقك
- تشوف معلوماتك بصفحة حسابك.
- تطلب نسخة منها، أو نصلّح شي بيها، أو نمسح الحساب كله. راسلنا، ونسويها خلال ٣٠ يوم.
- تطلع من الحساب بأي وقت.
٧الصغار
إذا عمرك أقل من ١٣ سنة، لا تسوّي حساب. وإذا عرفنا إن حساب لواحد أصغر، نمسحه.
٨إذا تغيّرت
إذا غيّرنا شي بهذي السياسة، نكتب التاريخ الجديد فوق، ونسألك توافق من جديد قبل ما تدخل لحسابك.
٩تواصل ويانا
أي سؤال، أو طلب نسخة أو مسح:
واتساب +964 781 114 9340 البريد [email protected] إنستغرام @myelonlabs